Home

… berretsi du Israelen azken oldarraldiak

begizta.net / Axier Lopez

Ehunka zauritu, dozenaka hildako, mila atxilotu baino gehiago, labankadak eta istiluak, kontrolik gabeko kolonoen erasoak, Israelgo eskuin muturraren goraldia… Palestinako presidente Mahmoud Abbasen eta Fatah alderdiaren bide diplomatikoa kale itsuan dagoela berretsi dute azken bi asteetako gertakariek.

Datuen gordina
Urriaren hasieratik 400 palestinar baino gehiago atxilotu ditu Israelgo Poliziak. Palestinako Preso politikoen antolakundeak salatu du atxilotutakoen erdia 14 eta 20 urte arteko gazteak direla. Atxiloketa horiek Jerusalemgo Ekialdean eta Zisjordanian egin dituzte, baita Palestinako Aginte Nazionalaren kontrolpean dagoen A zonaldean ere.


Pasa den larunbatean soilik 174 palestinarri egin diote tiro eta 25 hil dituzte, Palestinako Ilargi Gorriaren arabera. Israelgo indar armatuek Palestinako Lurralde Okupatuetan 1.000 lagun baino gehitu zauritu dituzte, Ma’an berri agentziaren datuen arabera.

Gazari, Israelgo armadak lurrez kontrolpean ez duen eremua, airez eraso egin diote, ohi duten gisan. Igandeko azken erasoan bonba israeldarrek haurdun zegoen Nour Rasmi Hassan eta bi urteko alaba hil dituzte Rafah-n. Hildako alaba besoetan duela, Yahya Hassan-en samina erakusten duten irudi hauek munduko txoko askotako albistegietan ikusi ditugu:

Larunbatean 13 urteko Marwan Barbakh eta 15 urteko Khalil Othman gazatarrak hil zituzten Israelgo frankotiratzaileek, Gaza mugaldeko harresitik gertu –Khan Younis herrian–. Ostiralean, Zisjordanian hildako palestinarrekin elkartasunez protestan ari ziren beste sei palestinar hil zituzten tiroz Gazako eremu berean. Israelgo Gobernuak hilketa horien errua Hamasi egotzi dio.

Palestinarren itxaropen sastatua
Horren adibide ditugu azken egunetan hainbat palestinarrek, labana eskuan, egin dituzten erasoak. Azkena Haderan gertatu da. Israelgo nazionalitatea duen palestinar batek 4 israeldar labanaz zauritu ditu kale erdian.

Labainkaden ugaltzeak tentsioa handitu eta palestinar itxura duen ororekiko mesfidantza sortu du Israelen. Horren adibide garbia Afulako (Nazaret herritik gertu) bus geltokian ikusi dugu. Nazionalitate israeldarra duen 30 urteko Asraa Zidan Tawfik Abed palestinarra, eskuan labana zuela, tirokatu zuen Poliziak, segurtasun zaindari bat sastatu izanaren susmopean. Hilketaren bideoa sua bezala barreiatu da sarean, zalantzaren aurrean Israelgo poliziek, kolonoek eta segurtasun indarrek tiro egiteko duten erraztasunaren erakusgarri:


Aipatzekoa da labanaz egindako eraso hauen egileek ez dutela lotura zuzenik Palestinako inolako alderdi edo mugimendu politikorekin. Hau da, desesperazioak edo suminak eragindakoak izan direla eta ez inoren agindua. Ia kasu guztietan heriotza izan da erasotzaileen patua, beraz ekintza suizidatzat hartu dute askok. Horregatik hain zuzen, Israelgo Inteligentzia zerbitzuak –bestelako erasoen egileak atzematen oso “eraginkorrak” direnak– ez dira gai izan horiek galarazten. Palestinako Aginte Nazionalaren saiakera diplomatikoen ezinak, nazioarteko komunitatearen konplizitateak eta pasibotasunak eta Israelgo Gobernuak palestinarren apartheid neurriak urtetik urtera gogortzen jarraitzeak… etsipenaren bide arriskutsuari ateak ireki dizkiote.

Abbasen isolamendua
Ustelkeria kasuek eta okupatzailearekin kolaboratzeagatik egindako salaketek jota dago Fatah alderdia, eta egunetik egunera gero eta handiagoa da haren isolamendua palestinarren barruan. Bide diplomatikoaren bideari itsu-mutsuan ekitea erabaki dute, orain arte jaso duten emaitza bakarra ohiko hitz politak eta keinu sinbolikoak izan badira ere. Munduko potentzia kapitalistek bazkide ona ikusten dute Fatah-ren bureau politikoa, dirulaguntzen kudeaketaren truke Palestinan suhiltzaile lanak egiteko prest azaldu da. Israelgo ezker instituzionalak proposatu eta Europako sozialdemokraziak bere egin duen “Bi estatuen konponbidearen” ezina egunetik egunera ageriago geratzen ari da. Izan ere, Israelgo sarraskien aurrean, “bi aldeei” biolentzia bertan behera uzteko dei ekidistanteari helduta jarraitzen du nazioarteko komunitatea delakoak. Mendebaldeko gobernu gehienek Ekialde Hurbileko “demokrazia aliatu bakartzat” hartzen dute Israel, egiten duena egiten duela. Historiak mila aldiz erakutsi digunez, bakea baino erakargarriagoa baita negozioa.

UTZI ERANTZUN BAT - DEJA UN RESPUESTA

Fill in your details below or click an icon to log in:

WordPress.com Logo

You are commenting using your WordPress.com account. Log Out / Aldatu )

Twitter picture

You are commenting using your Twitter account. Log Out / Aldatu )

Facebook photo

You are commenting using your Facebook account. Log Out / Aldatu )

Google+ photo

You are commenting using your Google+ account. Log Out / Aldatu )

Connecting to %s